黎姿Gigi (马黎珈而) 一直都致力于发展佢嘅医学美容事业，仲将生意越搞越大！最近，佢旗下嘅美容品牌就将会推出生活轻医美品牌，并连开3间疗程中心，非常厉害～而黎姿亦事事都亲力亲为，仲亲自邀请好友陈法拉做代言人！
#婚后淡出娱圈
即将迎来50岁生日嘅黎姿Gigi (马黎珈而) 同富商马廷强结婚后，就淡出娱乐圈，并专心照顾家庭同3个囡囡。不过，佢并冇因此而放弃事业，一直都有搞自己嘅美容生意，而家佢嘅美容生意范畴仲变得越嚟越大啊！
#推出全新品牌+3间疗程中心！
最近，黎姿旗下嘅美容品牌就正式宣佈将会推出全新嘅生活轻医美品牌，并会开设3间疗程中心，其中一间旗舰店仲成功进驻半岛酒店！而佢最近似乎亦正为新办公室嘅装修而变得忙碌，事事都亲力亲为嘅佢亦专程去正在施工中嘅办公室视察环境。
#率先公开新店舖内部！
黎姿仲喺IG有感而发：“由零开始探索，创立新品牌的过程中，获得到很多宝贵经历，感谢身边伙伴们的努力”，并公开新办公室嘅内部设计。由影片中所见，成个办公室以粉色为主调，睇落非常梦幻高贵～
#邀好友陈法拉做代言人
黎姿今次仲邀请咗好友陈法拉做品牌代言人，委託咗一班美国团队喺纽约同陈法拉进行广告拍摄。作为老闆嘅佢亦有份参与广告嘅制作，由广告场地、风格、服装等都全程参与其中；广告拍摄当日都可以克服同美国极大嘅时差，熬夜同团队以及法拉沟通，真係对新品牌非常用心！
#亲自去地铁站巡视业务
日前，品牌嘅广告灯牌就正式喺地铁站等地方亮相，而黎姿亦亲自乘搭地铁去巡查同视察环境，似乎对成果感到十分满意。而佢仲上载咗同囡囡一齐乘搭地铁嘅照片，唔少网民都大讚佢贴地！
#小时候家境困难
出生于演艺世家嘅黎姿曾经话小时候有一段时间家庭经济状况比较困难，一家人需要居住喺非常狭窄嘅环境内。而佢14岁嘅时候，喺机缘巧合下就获得参与拍摄电影嘅机会，并正式踏入娱乐圈。入行后，佢亦拍摄多部电视剧，成为当时嘅当红花旦！
#接手弟弟医美生意？！
不过，黎姿嘅弟弟黎婴喺2007年因为一场交通意外而半身瘫痪，疼爱弟弟嘅佢亦因此而暂停接拍电视剧，并接手管理弟弟嘅医学美容生意，由零开始学习管理生意。喺佢嘅悉心经营之下，成功将品牌变成上市公司。有消息仲话佢嘅美容生意身价高达$15亿，美容生意搞得好顺利啊～