无綫剧《黄金有罪》近期热播,有份主演嘅陈滢喺IG Story Post出幕后花絮片段,见佢同剧中男友洪永城拍紧一段掌掴戏份,内容係话洪永城疑心重觉得陈滢出轨就上前质问,激到陈滢先用纸袋「殴打」,后再赏巴掌。为咗可以一Take过,二人事前做足试位准备,洪永城仲笑陈滢浑身都是劲,搞到陈滢笑到弯晒腰,仲即时出拳还击,最后捱打嘅洪永城,被工作人员大讚係个硬汉子,笑翻全场!
另一边厢,陈滢再Post一条被剪走嘅精彩剧中剧片段,做咗明星嘅佢开始走红拍戏,见佢着上开高衩旗袍,化身打女一打二,起飞脚兼拳拳到肉,更加係百发百中,同平时嘅陈滢简直係判若两人!打到最后陈滢仲由一楼打住360度嘅觔斗跳落地下,完美落地后随即拔出藏喺黑丝嘅枪射杀对手,成段戏都非常精彩,好多镜头都见陈滢亲身上阵,相信佢都落咗唔少苦功!
好友陈嘉宝留言大讚「Cool gal」、江嘉敏仲笑话「我唔敢得罪你啦」,同时都吸引一众网民留言话「好精彩、好打得」、「你可以转做打女」、「好劲、好打得」、「咁就剪走咗好嘥」等!